У аэрапорце Токіа сутыкнуліся самалёты, загінулі 5 чалавек
Пажар пасля сутыкнення самалётаў / Reuters
У аўторак у міжнародным аэрапорце Ханеда ў Токіа сутыкнуліся самалёты, загінулі 5 чалавек. Усе 367 пасажыраў і 12 членаў экіпажа пасажырскага самалёта Japan Airlines, які прыляцеў з Хакайда, цудам выратаваліся ад пажару, паведамляе Reuters.
Пасажырскі самалёт пры пасадцы сутыкнуўся з самалётам берагавой аховы, пасля чаго загарэўся. Большая частка экіпажа (5 з 6 чалавек) самалёта берагавой аховы загінула. Вядома, што ён дастаўляў дапамогу пацярпелым ад магутнага землятрусу.
Падчас сутыкнення шасі Airbus адарвалася і паветранае судна фактычна слізгала на фюзеляжы па ўзлётна-пасадачнай паласе. Ратавальнікі адразу ж прыбылі на месца, усіх людзей з гэтага самалёта ўдалося эвакуіраваць. Праз некалькі хвілін Airbus цалкам згарэў.
