У 41 год памёр маёр міліцыі з Ляхавічаў, які ўдзельнічаў у рэпрэсіях
Андрэй Чаранкевіч / lves.by, для паляпшэння якасці здымак быў апрацаваны штучным інтэлектам
У Ляхавічах памёр маёр міліцыі Андрэй Чаранкевіч, піша "Наша Ніва". Выданне сцвярджае, што яму было 46 гадоў, але праваабаронцы MAYDAY заяўляюць, што памерламу быў 41 год, але яго паблыталі з цёзкам па прозвішчы.
У міліцыі ён праслужыў амаль 20 гадоў. Пачынаў дзяжурным у ізалятары часовага ўтрымання, а потым перайшоў у крымінальны вышук. Чаранкевіч даслужыўся да пасады старшага аперупаўнаважанага аддзялення крымінальнага вышуку Ляхавіцкага РУУС.
У "Чорнай кнізе Беларусі" паведамляецца пра ўдзел Чаранкевіча ў рэпрэсіях.
"У жніўні 2020-га даў каманду на захоп мірных грамадзянаў і ўдзельнічаў у затрыманні. Пераконвае падпісваць сфабрыкаваныя пратаколы, займаецца выманнем тэхнікі і падманам запрашае на допыты. 13 лістапада 2020 удзельнічаў у затрыманні мірных жыхароў Ляхавічаў, якія выйшлі ўшанаваць памяць забітага Рамана Бандарэнкі", — адзначае канал "ЧКБ Брэст і вобласць".
Прычына смерці Чаранкевіча невядомая. У яго, па звестках праваабаронцаў, засталіся жонка і дзве непаўналетнія дачкі.
