"Сапфір" і "Баражавальная труба": якая зброя распрацоўваецца ў Беларусі

Выстава ўзбраенняў Milex пройдзе ў Мінску ў канцы чэрвеня. Ужо цяпер Дзяржкамваенпрам дае справаздачу аб галоўных сваіх навінках, якія там пакажуць. Еўрарадыё вывучыла, што цікавага распрацавала беларуская "ваенка" і што трапіць на ўзбраенне не толькі ў наша войска, але і пойдзе на экспарт.

Ударныя дроны для дня і ночы

Беларускі ваенпрам асядлаў тэму беспілотнікаў некалькі гадоў таму, калі ім кіраваў цяперашні прэм'ер Раман Галоўчанка. Пачалі, зразумела, з сістэм процідзеяння дронам. Але з часам рукі дайшлі і да ўласнага наступальнага ўзбраення.

Канструктарскае бюро "Дысплэй" стварыла дроны "Квадра-1400" і "Баражавальная труба". Яны выкарыстоўваюць процітанкавыя гранаты РПК-26. Выпрабаванні беспілотнікаў прайшлі паспяхова.

"У красавіку 2021 года спецыялісты прадпрыемства правялі выпрабаванні ў дзённых і начных умовах з паспяховым паражэннем цэляў. Канструкцыйныя рашэнні гарантуюць надзейную эксплуатацыю ў раёнах не толькі з умераным кліматам, але і ў пустынных мясцовасцях з высокай тэмпературай, а таксама ва ўмовах высакагор'я", — анансуюць у камітэце.

Гранатамёт для стральбы з будынкаў

Свой гранатамётны комплекс на выставе пакажа "Белспецзнештэхніка". Назвалі яго паэтычна — "Сапфір". Праўда, ён усё роўна ў колерах мілітары.

Як анансуюць у Дзяржкамваенпраме, "Сапфір" прызначаны "для барацьбы з сучаснымі асноўнымі баявымі танкамі, браняванымі, лёгкабраняванымі і небраняванымі цэлямі, паражэння жывой сілы праціўніка ў сродках індывідуальнай бронеабароны, якая знаходзіцца ў бункерах, дзотах, лёгкіх сховішчах палявога тыпу, збудаваннях гарадскога і сельскага тыпаў".

"Адметная асаблівасць гранатамёта — магчымасць вядзення стральбы з малапамерных закрытых памяшканняў, дзякуючы малому калібру і плаўнаму старту рэактыўнай гранаты", — пішуць у камітэце.

"Сапфір" сапраўды дастаткова кампактны: даўжынёй 75 сантыметраў і вагой чатыры кілаграмы. Максімальная далёкасць стральбы — кіламетр.

Грузавік, дзе і паспаць можна

Войска — не толькі зброя, але і асабовы склад. Вось і прадпрыемства "Агат — электрамеханічны завод" прадставіць на Milex новы грузавы аўтамабіль для перавозкі салдат.

Мяркуючы па анонсе, аўтамабіль разлічаны на перавозку падраздзялення складам да 22 чалавек. У ім ёсць 18 спальных месцаў і адносныя выгоды: санітарна-бытавы адсек з прыбіральняй, мікрахвалёўкай, плітой, імбрычкам і халадзільнікам.

"Эксплуатацыя вырабу можа ажыццяўляцца ў любых кліматычных умовах у дыяпазоне тэмператур ад -40 да +50 °C на дарогах усіх катэгорый праходнасці", — адзначаюць у камітэце.

Хваляцца распрацоўшчыкі і тым, што абсталяванне аўтамабіля дазваляе "вырашаць задачы дыстанцыйнага патрулявання альбо нясення дзяжурства ў асаблівых умовах і, пры наяўнасці неабходных запасаў вады і правізіі, падтрымліваць на працягу 4–7 дзён жыццядзейнасць вайскоўцаў, якія знаходзяцца на борце".

Дарэчы, у час пратэстаў у Мінску ўжо былі заўважаныя аўтамабілі для перавозкі асабовага складу, абсталяваныя ложкамі. Але гэта, магчыма, была папярэдняя мадэль.

Ноўтбук супраць дронаў

"КБ Радар" абяцае прадставіць комплекс распазнання беспілотнікаў "Кіраса-М".

Мяркуецца, што гэты апарат можа вызначаць месцазнаходжанне і ідэнтыфікаваць беспілотнікі. Мяркуючы па відарысах, апублікаваных распрацоўшчыкамі, ён проста падключаецца да ноўтбука.
 

Машына для інфармацыйнай вайны

Яшчэ адно прадпрыемства ваенпрама — МНІПІ — стварыла незвычайны мабільны комплекс. Гучыць як апісанне чагосьці для "інфармацыйнай вайны".

"Комплекс прызначаны для аналізу інфармацыйных матэрыялаў, якія размяшчаюцца на электронных рэсурсах, распрацоўкі і вырабу аўдыё, відэа і друкаваных матэрыялаў", — анансуюць распрацоўшчыкі.

Акрамя таго, абсталяванне дапамагае дэманстраваць кантэнт, праводзіць трансляцыю, перадаваць інфармацыю на спадарожнікі, а таксама праводзіць маніторынг тэлебачання.

Топ-пастаўшчык узбраенняў

У пачатку сакавіка Стакгольмскі міжнародны інстытут даследаванняў праблем міру (SIPRI) уключыў Беларусь у топ-20 спіса найбуйнейшых экспарцёраў зброі.

Гадавы аб'ём экспарту прадукцыі Дзяржкамваенпрама ацэньваецца ў суму больш за 1 млрд долараў. У цэлым больш за 70% усёй прадукцыі ідзе за мяжу.

Асноўныя партнёры беларускага ВПК традыцыйна — Кітай і Расія. Акрамя таго, вядома пра гандаль беларускай зброяй з ААЭ і Азербайджанам.

SIPRI у якасці асноўных кліентаў беларускай "ваенкі" пазначаў таксама В'етнам, Сербію і Судан. Цікава, што ў В'етнам, паводле ацэнак Інстытута, і зусім ідзе чвэрць усяго экспарту беларускіх узбраенняў.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.