Лукашэнка патрабуе ўзброіць патрулі міліцыі стралковай зброяй
Аляксандр Лукашэнка / president.gov.by
Патрулі паставой службы міліцыі павінны мець стралковую зброю. Такое даручэнне даў Аляксандр Лукашэнка на пашыранай нарадзе з сілавікамі 20 лютага.
"Патрулі павінны быць узброеныя. Стралковай зброяй. Як мінімум пісталетамі. І пра гэта павінны ведаць усе. І яны павінны хадзіць спакойна па вуліцах. Гарантыя — ніякіх злачынстваў у гэтых раёнах не будзе", — заявіў Лукашэнка.
Паводле яго, узброеныя сілавікі на вуліцах дазволяць беларусам "пачувацца ў бяспецы дома, на працы, на вуліцы ў любы час сутак".
Кантроль над гэтым пытаннем Лукашэнка даручыў адразу некалькім ведамствам — МУС, КДБ, спецслужбам і пракуратуры.
