Іосіф Сярэдзіч сыходзіць з "Народнай волі"

Іосіф Сярэдзіч сыходзіць з "Народнай волі". Ён спасылаецца на ўзрост. 

"Праз пару месяцаў мне пойдзе 75-ы год, — піша Сярэдзіч на сваёй старонцы ў Facebook. — І хочаш не хочаш, а трэба развітвацца з цяжкай штодзённай працай — і здароўе нагадвае пра неабходнасць супыніцца, і абставіны часу не спрыяюць актыўнай дзейнасці".

Ён нагадвае пра праблемы, з якімі сутыкнулася ў Беларусі "Народная воля": ёй адмовілі ў друкарскіх паслугах, і яна стала электроннай, пасля анулявалі пасведчанне аб рэгістрацыі газеты. "Без усялякіх падстаў знішчылі выданне", — з сумам піша яго заснавальнік.

Правы ўласніка на сайт "Народнай волі" Іосіф Сярэдзіч афіцыйна перадаў іншай асобе, якая пакуль не называецца. Сайт, дарэчы, часова не працуе — "на пару дзён закрыты на тэхабслугоўванне ў сувязі са зменай ўладальніка дамена".

Першы нумар "Народнай волі" выйшаў 11 ліпеня 1995 года. Ад пачатку яе галоўным рэдактарам быў Сярэдзіч.