Хутчэй за ўсё, вясной нас чакае трэцяя хваля каранавіруса — Румо

Не выключана, што вясной здарыцца трэцяя хваля каранавіруса, заявіў дырэктар Мінскага навукова-практычнага цэнтра хірургіі, транспланталогіі і гематалогіі Алег Румо.

"Інфекцыя будзе развівацца па класічных прынцыпах сучаснай эпідэміялогіі, таму, хутчэй за ўсё, вясной нас чакае трэцяя хваля", —  сказаў ён у інтэрв'ю выданню "СБ. Беларусь сегодня".

Патрэбна прышчэпка, і Румо спадзяецца, што ўжо ў наступным годзе беларусы змогуць "прышчэплівацца не толькі ад грыпу, але і ад каранавіруса".

"А пакуль кожнаму застаецца выконваць рэкамендацыі лекараў і берагчы сябе", — дадаў ён. Другая хваля, прызнаў медык, аказалася больш напружанай, чым першая. У рэанімацыі МНПЦ зараз заняты 11 ложкаў з 12.

"Кантынгент — маладыя людзі да 50 гадоў, цяжарныя, медыкі і жанчыны, якія толькі сталі мамамі", — сказаў Румо.

У першую хвалю, паводле яго слоў, лятальнасць была каля 25 адсоткаў, "гэта значыць з чатырох самых цяжкіх пацыентаў трох ўдавалася паставіць на ногі".

На цяжар захворвання ўплываюць два фактары: колькасць віруса, які патрапіў у арганізм, і рэакцыя арганізма. Прычым спрагназаваць гэтую рэакцыю немагчыма. "Людзі без спадарожных захворванняў раптоўна згараюць, і мы часам нічога не можам з гэтым зрабіць", распавёў Румо.

У Беларусі яшчэ не было ніводной перасадкі лёгкіх у людзей, якія цяжка перанеслі каранавірус. Але ўжо ёсць пацыенты з цяжкім фіброзам, якія могуць апынуцца ў лісце чакання на перасадку.

Румо таксама паскардзіўся на адсутнасць зараз грамадскай падтрымкі, якую медыкі адчулі вясной, але не знайшоў, што адказаць на пытанне, з чым гэта можа быць звязана.

З пачатку пандэміі ў Беларусі выяўлены 118 тысяч 8 чалавек з станоўчым тэстам на COVID-19. Апошнімі днямі ў Беларусі фіксуецца штосутачнай прырост інфікаваных на ўзроўні 1250-1300 чалавек. Гэта больш, чым было вясной.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.