ЗША вядуць перамовы з Мінскам аб прыездзе ў Беларусь амбасадара Джулі Фішэр

ЗША вядуць перамовы з беларускімі ўладамі аб прыездзе ў Мінск прызначанага пасла Джулі Фішэр, распавёў у інтэрв'ю "Радыё Свабода" намеснік памочніка сакратара Бюро па еўрапейскіх і еўразійскіх справах Дзярждэпартамента ЗША Джордж Кент.

Ён нагадаў, што ў пачатку года Джулі Фішэр здзейсніла паездку ў Еўропу, наведала Вільню, Варшаву і Стакгольм, дзе абмяркоўвала, у тым ліку, і беларускую тэму.

"Мы прапрацоўваем шматступенны працэс з мэтай дамагчыся, каб прызначаная амбасадар Фішэр прыехала ў Мінск як мага хутчэй і прыступіла да выканання сваіх абавязкаў у Беларусі", — сказаў Кент.

Цяпер, паводле яго слоў, гэты працэс абмяркоўваецца з беларускім урадам. Джордж Кент таксама адзначыў, што Фішэр можа прыбыць у Мінск незалежна ад таго, што Беларусь пазбавілася свайго прызначанага амбасадара ў ЗША. У канцы мінулага года раптоўна памёр Алег Краўчанка, які павінен быў узначаліць дыпмісію ў ЗША.

У Вашынгтоне гэтую навіну ўспрынялі са шкадаваннем: "Гэта стала трагедыяй як для яго сям'і, так і для Беларусі і нашых адносін", адзначыў Кент, і дадаў, што "мы таксама лічым, што можна рухацца наперад з пытаннем прыбыцця ў Мінск пасла незалежнага ад гэтага".

Нагадаем, раней кіраўнік МЗС Беларусі Уладзімір Макей, каментуючы еўрапейскую паездку Фішэр, заявіў, што ў Мінску хацелі б бачыць амерыканскага амбасадара. Пры гэтым ён адзначыў, што калі ў Джулі Фішэр "ёсць нейкія прадузятасці, звязаныя з уручэннем даверчых грамат, то трэба падумаць яшчэ".

Пра санкцыі і палітыку Байдэна ў дачыненні да Беларусі

Кента спыталі таксама аб фармаце беларуска-амерыканскіх адносін з улікам падзей, які ў апошнія паўгода адбываліся ў Беларусі.

Ён нагадаў, што ўведзеныя ў 2006 годзе санцыі ў дачыненні да Мінска былі прыпыненыя ў 2015 годзе ў сувязі з паляпшэннем сітуацыі з правамі чалавека. З 2015-га па 2020-ы ў Беларусі не было палітвязняў. У мінулым годзе яны зноў з'явіліся.

"Пазіцыя ЗША адназначная: палітычных зняволеных быць не павінна, і Беларусь павінна вызваліць усіх палітвязняў", —  адзначыў Кент.

Ён таксама сказаў, што глабальнай змены палітыкі ЗША ў дачыненні да Беларусі з прыходам новай адміністрацыі ў Белы дом чакаць не варта.

"Два асноўныя напрамкі нашай палітыкі —  падтрымка незалежнай, суверэннай Беларусі, а таксама падтрымка правоў чалавека ... права грамадства выбіраць сваіх лідараў шляхам свабодных і сумленных выбараў —  гэта прынцыпы, якія былі прынятыя як папярэдняй адміністрацыяй, так і цяперашняй адміністрацыяй Байдэна", — падкрэсліў Кент.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.