За "падпал дома Гайдукевіча" вынеслі прысуды да 25 гадоў зняволення
Прысуд па "справе аб падпале дома Гайдукевіча" / mlyn.by
Мінскі гарадскі суд агучыў прысуды па "справе аб падпале дома дэпутата Гайдукевіча". Падсуднымі былі 18 чалавек, сярод якіх трое — завочна.
Падчудных абвінавачвалі ў планаванні і здзяйсненні шэрагу актаў тэрарызму, у тым ліку ў дачыненні да дэпутата Алега Гайдукевіча, а таксама іншых злачынстваў, паведамляюць дзяржаўныя СМІ. На ўсіх абвінавачаных разам пракуратура прасіла 245,5 года зняволення.
Максімальна магчымы тэрмін прысудзілі экс-рэстаратару Вадзіму Пракоп'еву — 25 гадоў калоніі ўзмоцненага рэжыму, з іх 5 гадоў турмы. Таксама яго аштрафавалі на 1 тысячу рублёў. Кватэра ў Мінску пакінутая пад арыштам.
Пракоп'ева асудзілі завочна: ён пакінуў Беларусь яшчэ ў 2020-м. Таксама завочна асудзілі Хаміцэвіча і Чамякіна.
Вялікія тэрміны атрымала сям'я Вайцяховічаў: Уладзіслаў (сын) і Віталь (бацька) асуджаныя на 21 год і 19 гадоў адпаведна, Настассі (жонцы сына) і Вользе (маці) прысудзілі па 11 гадоў.
Сяргею Лісоўскаму і Паўлу Чамякіну прысудзілі па 20 гадоў, Уладзіміру Савянкову і Дзянісу Хаміцэвічу — па 16 гадоў узмоцненага рэжыму кожнаму. Прычым усім ім першыя 5 гадоў суд прызначыў правесці ў турэмных умовах.
Сяргей Сакалоў асуджаны на 14 гадоў узмоцненага рэжыму і штраф у памеры 700 базавых, Дзмітрый Невяркевіч — на 11 гадоў узмоцненага рэжыму і 3 тысячы базавых.
Вользе Петух і Мікалаю Рою прысудзілі 10 гадоў агульнага рэжыму і 12 гадоў узмоцненага рэжыму адпаведна. Экс-супрацоўніку Следчага камітэта палкоўніку юстыцыі Паўлу Чыхінскаму, Дзянісу Філончыку і Пятру Юркевічу — па 9 гадоў узмоцненага рэжыму. Эдуарду Пестраку прызначылі 3,5 года ўзмоцненага рэжыму.
Аляксею Міхайлаву прысудзілі 2 гады агульнага рэжыму і вызвалілі ў зале суда, бо гэты тэрмін ён цалкам адбыў падчас следства.
Усіх сілавікоў, якія праходзілі па гэтай справе, пазбавілі званняў.
Інцыдэнт адбыўся ў чэрвені 2021 года. Тады дэпутат Палаты прадстаўнікоў Алег Гайдукевіч заявіў, быццам яго дом хацелі падпаліць і кінулі тры бутэлькі з "кактэйлем Молатава". Адзінай пацярпелай, аднак, стала котка Гайдукевічаў, у якой быў абпалены нос.
