Валер Сахашчык распавёў пра лёс добраахвотнікаў, што знаходзяцца ў палоне
Валер Сахашчык
Украіна памятае пра беларускіх добраахвотнікаў, якія знаходзяцца ў расійскім палоне, кажа прадстаўнік кабінета Святланы Ціханоўскай Валер Сахашчык ў размове з Еўрарадыё. Ён асабіста неаднаразова звяртаўся да адказных па гэтым пытанні людзей.
"І атрымоўваў адказ: гэта вельмі далікатнае пытанне. Беларусы, што знаходзяцца ў палоне, з'яўляліся і з'яўляюцца вайсковаслужбоўцамі Узброеных сіл Украіны. Іх вызваленнем займаецца украінская дзяржава. Раней ці пазней вынік будзе, яны будуць вызваленыя. Але калі — прагназаваць цяжка, бо да гэтай пары і тысячы ўкраінскіх ваенных знаходзяцца ў палоне", — тлумачыць Сахашчык.
Паўплываць на тэрміны вызвалення беларусаў кабінет не мае магчымасці.
Вядома пра як мінімум двух беларускіх добраахвотнікаў, што трапілі ў палон падчас баявых дзеянняў ва Украіне. Гэта Сяргей "Клешч" Дзягцёў і Ян "Тромблі" Дзюрбейка. Гісторыю Кляшча Еўрарадыё падрабязна распавядала тут.
