У Палаце прадстаўнікоў прагаласавалі за SMS-паведамленні з ваенкамата
У паведамленні будзе інфармацыя пра адпраўніка, час і адрас, куды неабходна з'явіцца ваеннаабавязанаму / pixabay.com
28 лютага Палата прадстаўнікоў прыняла ў другім чытанні праект закона "Аб змяненні законаў па пытаннях забеспячэння нацыянальнай бяспекі". Сярод новаўвядзенняў — SMS-паведамленні, якімі могуць выклікаць у ваенкамат і ў "органы дзяржаўнай бяспекі".
Летась начальнік Генеральнага штаба, першы намеснік міністра абароны генерал-маёр Віктар Гулевіч заявіў, што SMS-паведамленне не заменіць позву ў ваенкамат, яно будзе абавязковым толькі ў ваенны час.
Таксама з'явіліся "прававыя асновы ўдзелу грамадзян на добраахвотнай аснове ў выкананні работ абароннага характару ў мірны час". Ваенныя камісары атрымліваюць права абмяжоўваць выезд за мяжу грамадзян, якія "парушаюць абавязкі па воінскім уліку і ўхіляюцца ад мерапрыемстваў прызыву на вайсковую службу".
Цяпер закон павінен ухваліць Савет Рэспублікі.
