Польская кампанія страціла кантроль над сваёй дачкой, якая валодае “Буслікам"
Дзіцячая вопратка і канцэлярскія прылады / pixabay
Польская кампанія CDRL заявіла пра страту кантролю над даччынай кампаніяй ТАА "ДПМ" (сетка крамаў "Буслік").
Раней кампанія заяўляла, што беларускі "Альфа-Банк" запатрабаваў у 10-дзённы тэрмін пагасіць крэдыт памерам у 3,95 млн долараў. Прычынай такога патрабавання было названае "ўзнікненне прыкмет неплацежаздольнасці". Але ліквідных сродкаў для пагашэння крэдыту ў такі тэрмін у CDRL не было.
"У святле вышэйсказанага праўленне прызнала, што цяпер немагчыма распараджацца даччынай кампаніяй, таварамі і фінансавымі сродкамі ў адпаведнасці з вызначанай у CDRL гандлёвай стратэгіяй і палітыкай", — гаворыцца ў заяве.
Сярод прычын кампанія назвала ў тым ліку палітычную сітуацыю ў Беларусі, якая "праяўляецца ў значным уплыве беларускіх органаў на фармаванне гандлёвых адносін і эканамічнай сітуацыі даччынай кампаніі".
Сетка "Буслік" на цяперашні момант налічвае больш за 40 крамаў у 20 гарадах Беларусі. CDRP набыла 90% акцый "ДПМ" у 2018 годзе. Астатнія 10% акцый належалі заснавальніку кампаніі Сяргею Місячэнку.
