Калі за падарункі прыйдзецца заплаціць падаткі? Тлумачэнне чыноўнікаў

У Міністэрстве падаткаў і збораў Беларусь патлумачылі, за грашовыя падарункі якога памеру не трэба будзе плаціць падатак пасля падачы дэкларацый у 2024 годзе.

Як удакладніла начальніца ўпраўлення інфармавання плацельшчыкаў інспекцыі МПЗ па Мінску Алена Хадынская, прынцып і крытэрыі падаткаабкладання падарункаў у Беларусі не памяняліся, толькі трохі вырасла сума, з якой не трэба "адшпільваць" дзяржаве 13%.

Калі ў 2023 ад падаткаў былі вызваленыя грашовыя падарункі ў агульным памеры да 9338 рублёў, цяпер — да 10431 рубля. Выключэнне — падарункі ад блізкіх сваякоў.

Калі пералік адбыўся ў валюце, падаткавікі будуць пералічваць у рублі па курсе Нацбанка на той момант, каб вызначыць, ці трэба вам заплаціць падатак.