ЕС не вядзе вайну, але гатовы рэагаваць на пагрозы ад "самазванца" Лукашэнкі
Аляксандр Лукашэнка з вайскоўцамі, ілюстрацыйнае фота / прэс-служба Лукашэнкі
Еўрасаюз не ваюе, але рыхтуецца супрацьстаяць пагрозам з боку Беларусі і Расіі. Гэтыя словы прадстаўніка замежнапалітычнай службы ЕС Петэра Стана прыводзіць выданне Euobserver.
Еўрачыноўнік назваў Лукашэнку "самазванцам, які скраў выбары", і "саўдзельнікам злачынстваў, учыненых Расіяй супраць Украіны". Паводле Стана, ЕС яшчэ з першага дня расійскай агрэсіі прымае меры перасцярогі.
"Мы працуем над тым, каб Еўропа была найлепшым чынам абсталяваная для супрацьстаяння ўсім пагрозам, якія зыходзяць ад такіх людзей, як Лукашэнка ці Пуцін", — заявіў ён.
Прадстаўнік ЕС у сваёй прамове не аднойчы згадваў Лукашэнку як адмоўны прыклад. "Ніхто не павінен баяцца ЕС, акрамя людзей, якія падрываюць міжнародныя нормы і дэмакратыю, як Лукашэнка", — канстатаваў Стана.
Як распавядала Еўрарадыё, 2 красавіка падчас паездкі ў Гродна Лукашэнка заявіў, што ён рыхтуе Беларусь да вайны.
