Для медыкаў хуткай у Мінску купілі 800 персанальных відэарэгістратараў

Мінскіх медыкаў хуткай дапамогі забяспечылі відэарэгістратарамі, паведамляе прэс-служба Мінздароўя.

Цяпер у гарадской станцыі хуткай меддапамогі вядзецца аўдыя- і відэазапіс выездаў брыгад з выкарыстаннем персанальных рэгістратараў (ПВР). Мэтай такіх запісаў называецца не толькі кантроль якасці аказання дапамогі, але і фіксацыя супрацьпраўных дзеянняў некаторых грамадзян.

Паведамляецца, што для медыкаў хуткай былі закупленыя амаль 800 ПВР і 22 тэрміналы для захавання інфармацыі і іх зарадкі.

У аператыўным аддзеле станцыі ўсталявалі спецыяльнае праграмнае забеспячэнне. Таксама прынятыя меры па захаванасці і абароне атрыманай відэаінфармацыі. Відэазапісы, як сцвярджаюць у Мінздароўя, не могуць быць выкарыстаныя ў асабістых ці іншых мэтах, не звязаных з прафесійнай дзейнасцю.