Зніклага ў Камянецкім раёне хлопчыка шукаюць з сабакамі і квадракоптарамі
Міліцыянты пашырылі зону пошукаў зніклага ў Камянецкім раёне хлопчыка. Пра гэта агенцтву БЕЛТА распавяла афіцыйная прадстаўніца УУС Брэсцкага аблвыканкама Ганна Івашчанка.
У пошуках занятыя супрацоўнікі міліцыі, МНС, пагранслужбы і ўнутраных войскаў, а таксама валанцёры. Сёння яны абследавалі плошчу каля 640 га. У вёсцы, дзе знікла дзіця, праверылі ўсе падворкі, закрытыя і адкрытыя памяшкання, студні, а таксама палі, лясны масіў. Акрамя таго, вадалазы даследавалі 6,3 км меліярацыйнага канала. "У пошукавай аперацыі задзейнічаныя службовыя сабакі, розная тэхніка, у тым ліку квадракоптары", — удакладніла Івашчанка.
Зона пошукаў пашыраная ў адзін бок прыкладна на 6 км, у другі — на 12 км.
Пошукі Івана Валошына, якому споўніўся 1 год і 11 месяцаў, пачаліся з вечара 10 красавіка. Тады ў міліцыю звярнулася ягоная маці — жыхарка вёскі Любашкі. Хлопчык быў апрануты ў сінюю спартыўную кофту з чырвонымі палосамі на рукавах.
