Жыццю беларусаў з перакуленага аўтобуса нічога не пагражае — консул у Польшчы
Беларускі аўтобус трапіў у аварыю ў Польшчы / twitter.com/PBialska
Пагрозы жыццю беларусаў-пасажыраў аўтобуса, які перакуліўся ў Польшчы, няма. Пра гэта інфармагенцтву БЕЛТА заявіў консул Беларусі ў Бялай-Падлясцы Уладзіслаў Хало.
Паводле яго, некалькіх грамадзян даставілі ў шпіталі. У бальніцы горада Бяла-Падляска знаходзяцца чатыры чалавекі.
Консул дадаў, што нічога страшнага з пасажырамі не здарылася: "Там маладзейшы 14-гадовы падлетак. Экстранай нейкай дапамогі не трэба. Усё ў гэтым плане досыць прасочваецца і нармальна вырашаецца. Гэтых чатырох чалавек дыягнастуюць на прадмет таго, ці могуць яны працягнуць далей дарогу".
Хало падкрэсліў, што пры неабходнасці экстранай дапамогі была б магчымасць задзейнічаць і беларускі бок, бо аварыя здарылася недалёка ад мяжы з Беларуссю. Але гэта не спатрэбілася.
Польскі перавозчык прадаставіў пасажырам запасны аўтобус. Неўзабаве яны паедуць далей па сваім маршруце. Аўтобус накіроўваўся з Беларусі ў Модлін — аэрапорт пад Варшавай.
Як распавядала Еўрарадыё, перакуліўся зранку 5 ліпеня каля польскага Цярэспаля пасля праходу мяжы. У аўтобусе ехалі 49 чалавек. Папярэдне паведамлялася пра 11 пацярпелых.
