Заява пра затрыманне Брэдзелева знікла з сайта A1 Telekom Austria Group
З сайта A1 Telekom Austria Group знік каментар пра затрыманне прэс-сакратара беларускай кампаніі Мікалая Брэдзелева, заўважыў dev.by.
У гэтым каментары кампанія рашуча асудзіла ўмяшанне ў асабістае жыццё свайго супрацоўніка і абяцала падтрымліваць і абараняць яго "ўсімі даступнымі юрыдычнымі і дыпламатычнымі спосабамі".
Мікалая Брэдзелева затрымалі 10 снежня. Пасля гэтага ў дзяржСМІ з'явіліся заявы, быццам ён перадаваў даныя кліентаў А1 апазіцыйным рэсурсам. Аляксандр Лукашэнка загадаў праверыць кампанію і прыняць "самыя жорсткія меры".
Праз 15 сутак пасля затрымання Брэдзелеў не выйшаў на волю. Як піша dev.by, з'явілася інфармацыя, што ён, верагодна, звольнены з кампаніі. Аднак ад самой А1 каментароў на гэты пакуль няма.
