За шпацыр з БЧБ-парасонам дзяўчыну арыштавалі на 25 сутак

У судзе Цэнтральнага раёна Мінска 8 красавіка судзілі сям'ю Міхайлавых, затрыманую ўчора пасля ператрусу ў Прылуцкай Слабадзе, паведамляюць праваабаронцы "Вясны". 

Пасля затрыманняў мінская міліцыя заяўляла, што гэта актыўныя ўдзельнікі "жаночага маршу" з бел-чырвона-белымі парасонамі, а "падчас санкцыянаванага агляду домаўладання выяўленая атрыбутыка, якая асацыюецца з пратэснай".

Суддзя Вікторыя Шабуня судзіла 30-гадовую Юлію Міхайлаву, абвінавачаную па ч.3 арт. 24.23 КаАП (несанкцянаванае масавае мерапрыемства). Для Юліі гэта ўжо шостае затрыманне. 

У пратаколе сцвярджалася, што 6 красавіка з 18:05 па 18:20 Юлія ўдзельнічала ў несанкцыянаваным шэсці на праспекце Пераможцаў у групе з дзесяці чалавек "з мэтай выказвання свайго грамадска-палітычнага настрою". Міліцыянты запісалі, быццам дзяўчына ішла з БЧБ-парасонам і крычала: "Жыве Беларусь!". У якасці доказаў яе віны на судзе былі пададзеныя фатаздымкі партала TUT.BY.

Дзяўчына пацвердзіла, што яна ішла па праспекце ў той дзень, але з белым парасонам. Юлія заявіла, што нічога не выкрыквала, нічым не махала і нічога не выказвала. Па яе словах, пасля затрымання сілавікі на яе крычалі і пагражалі, аказаваючы псіхалагічны ціск.

Суддзя Шабуня прысудзіла Юліі Міхайлавай 25 сутак арышту. Чакаюцца суды таксама над яе братам Пятром і маці Таццянай. 

Старэйшую сястру Юліі Лілію ўчора вызвалілі, бо ў яе непаўналетнія дзеці.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.