У Салігорску затрымалі ўдзельнікаў шпацыру па горадзе

У цэнтры Салігорска ўдзень 3 кастрычніка затрымана 8 чалавек. Гэта ўдзельнікі шпацыру па горадзе, на які сябры стачкама "Беларуськалія" запрасілі людзей з усёй Беларусі.

На ўездах у Салігорск з боку Мінска з раніцы 3 кастрычніка дзяжурылі супрацоўнікі ДАІ і сілавікі ў бронекамізэльках. Яны выбарачна спыняюць легкавыя аўтамабілі і маршруткі. Нягледзячы на гэтыя перашкоды, па інфармацыі Еўрарадыё, на шпацыр у салігорскі Парк чатырох стыхій сабралася блізу 300 чалавек.

Яны збіраліся пазнаёміцца, разам паспяваць песні, зрабіць сэлфі і папіць гарбаты: "Нікога не баімся, усмешлівых супрацоўнікаў вітаем усмешкай, ад негатыўна настроеных проста адварочваемся. Грамадскі парадак не парушаем, правакатараў гонім у шыю!", — так гучала запрашэнне.

Але ледзь толькі пачалася экскурсія — прыехала міліцыя і пачаліся затрыманні. У ліку затрыманых апынуўся адзін з лідараў забастовачнага руху Юрый Корзун. Амаль месяц таму, 10 верасня ён пасля змены застаўся ў шахце на глыбіні ў 305 метраў, прыкаваўшы сябе да працоўнага абсталявання.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.