У Мінску затрыманы блогер, які зняў фільм пра наркагандаль у Беларусі
4 верасня ў Мінску затрымалі блогера Паўла Спірына. У яго кватэры адбыўся ператрус, паведамляе TUT.by.
Жонка блогера Ірына распавяла, што каля 8:30 раніцы ў іх кватэры знікла электрычнасць. Жанчына адчыніла ўваходныя дзверы, каб паглядзець, ці ўсё ў парадку ў электрашчытку, і тут жа ў кватэру ўварваліся тры чалавекі. Па словах жанчыны, два былі ў цывільнай вопратцы, а трэці ў чорнай форме і балаклаве. Яны адразу начапілі на Спірына кайданкі і выклікалі групу для ператрусу.
У Спірына канфіскавалі ноўтбук, мікрафон, тэлефон, фотаапарат і навігатар.
Па словах жонкі, Спірына затрымалі па крымінальнай справе паводле ч. 1 арт. 130 Крымінальнага кодэкса (наўмысныя дзеянні, накіраваныя на ўзбуджэнне расавай, нацыянальнай, рэлігійнай альбо іншай сацыяльнай варожасці або варожасці па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці). Справа была пачатая ў сувязі з фільмам Паўла Спірына "Грань", які рапавядае пра наркагандаль у Беларусі.
Гэты фільм унесены ў Беларусі ў спіс эстрэмісцкіх матэрыялаў.
Жонка блогера згадвае. што праверку па ім праводзіў Цэнтральны апарат МУС, і тады крымінальную справу пачынаць не сталі. Цяпер жа фільмам заняўся Следчы камітэт.
Спірына затрымалі пакуль што на трое сутак.
Дарэчы, сёлета Павел Спірын збіраўся ўдзельнічаць у прэзідэнцкіх выбарах, але яго ініцыятыўную групу не зарэгістравалі ў ЦВК.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.