У Мінску пройдуць дэбаты паміж кандыдатамі ў дэпутаты, але не ў жывым эфіры

У Мінску пройдуць дэбаты паміж кандыдатамі ў дэпутаты Палаты прадстаўнікоў. Але не ў прамым эфіры. Вядома, што дэбаты будуць запісвацца на наступным тыдні, іх пакажа тэлеканал "Беларусь 3".

Аб сваім удзеле ў дэбатах паведамілі кандыдат па Усходняй выбарчай акрузе №107 Андрэй Бажко і кандыдат па Кастрычніцкай выбарчай акрузе №97 Яўген Казлоўскі. Абодва яны з Рэспубліканскай партыі. Па словах Бажко, ён будзе дэбатаваць з кіраўніком праўладнай "Белай Русі" Генадзем Давыдзькам і яшчэ чатырма кандыдатамі. Абменьвацца думкамі з Казлоўскім будзе першы сакратар Мінскай гарадской арганізацыі БРСМ Сяргей Клішэвіч.

Калі дэбаты выйдуць у эфір, кандыдатам пакуль невядома.

Раней Генадзя Давыдзьку выклікаў на дэбаты ў студыі Еўрарадыё старшыня апазіцыйнага руху "За свабоду" Юрась Губарэвіч. Аднак старшыня "Белай Русі" адмовіўся. Пазней Губарэвічу адмовілі ў рэгістрацыі кандыдатам у дэпутаты.

Тэледэбаты праводзяцца для таго, каб двое ці больш кандыдатаў у дэпутаты Палаты прадстаўнікоў маглі выказацца аб праблемах, значных для грамадства, і пракаментаваць думкі адно аднаго. Таксама падчас дэбатаў кандыдаты маюць права пракаментаваць выбарчыя праграмы іншых кандыдатаў.

Тэледэбаты праводзяцца са згоды кандыдатаў. Але калі кандыдат адмаўляецца ўдзельнічаць у дэбатах, ён не атрымлівае больш бясплатнага эфірнага часу. Таксама паводле Выбарчага кодэксу кандыдат мае права адправіць на дэбаты сваю давераную асобу.

Выбары дэпутатаў Палаты прадстаўнікоў сёмага склікання пройдуць 17 лістапада.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.