У Літве "ашаламляльныя рэкорды" Пуціна назвалі "трагічным фарсам"

Міністр замежных спраў Літвы Габрыэлюс Ландсбергіс назваў выбары прэзідэнта Расіі "трагічным фарсам". Паводле яго слоў, гэтая працэдура не была ні добрасумленнай, ні свабоднай і тым больш не адпавядала агульнапрызнаным дэмакратычным стандартам і прынцыпу вяршэнства закона.

"З беззаконня не можа ўзнікнуць закон, а з прымусу, прыгнёту і фальсіфікацыі — не можа ўзнікнуць паважаная ў міжнароднай прасторы легітымнасць, — цытуе словы Ландсбергіса Delfi. — Таму мы не лічым і не называем гэтую фальсіфікаваную і імітацыйную працэдуру выбарамі, таму што яна, на жаль, больш падобная на трагічны фарс".

Пазней з'явіцца ацэнка прэзідэнцкіх выбараў у РФ з боку Еўрасаюза.

Выбары ў РФ поўныя "рэкордаў". Гэта і небачаная дагэтуль яўка — 77,44%, паводле ЦВК Расіі (на выбарах прэзідэнта РСФСР у 1991-м было 74,66%). Атрымліваецца, што на выбарчыя ўчасткі прыйшло больш за 87 мільёнаў расіян. Яшчэ адзін "рэкорд" — 87,29% за Уладзіміра Пуціна. Для яго гэта азначае яшчэ адзін шасцігадовы тэрмін.

Аляксандр Лукашэнка прызнаўся, што не чакаў такога выніку ў Пуціна. Назваў яго "ашаламляльным".