Вы тут

У 4 разы за 10 гадоў? Наколькі рэальна павялічылася працягласць жыцця ў Беларусі

Беларусы па версіі дзяржаўнай прапаганды

У дзяржаўнай прапагандзе беларусы ператварыліся ў "несмяротных" Дунканаў Маклаўдаў. На "Беларусь 1" паведамілі, што працягласць жыцця ў Беларусі за апошнія дзесяць гадоў вырасла ў чатыры разы. Улічваючы, што ў 2010 годзе чаканая сярэдняя працягласць жыцця была каля 70 гадоў, то колькі гадоў беларусам напрарочылі прапагандысты?

Вядома, для разліку працягласці жыцця існуюць розныя методыкі. Але ні адна з іх не пакажа росту ў чатыры разы за дзесяць гадоў.

Дык на колькі ж гадоў за апошняе дзесяцігоддзе змянілася працягласць жыцця ў Беларусі? Еўрарадыё разабралася ў гэтым пытанні.

Што такое працягласць жыцця

Паколькі змераць сярэднюю працягласць жыцця для канкрэтнага пакалення можна толькі пасля таго, як усе яго прадстаўнікі памруць, то каштоўнасць такога паказчыка для тых, хто жыве цяпер, невялікая.

Таму ў статыстычных публікацыях выкарыстоўваецца чаканая працягласць жыцця пры нараджэнні. Гэта колькасць гадоў, якую пражыве нованароджаны пры захаванні бягучых паказчыкаў смяротнасці.

У рэальнасці гэтыя ўмовы будуць змяняцца і асобна ўзятая група насельніцтва пражыве больш або менш у залежнасці ад змененых умоў.

ААН

Дэпартамент па эканамічных і сацыяльных пытаннях ААН у справаздачы па Беларусі за 2019 год апублікаваў, што сярэдняя працягласць жыцця беларуса ў 2010 годзе была 69,3, а ў 2020-м чакаецца 74,5 года. Атрымліваецца, што за дзесяцігоддзе рост усяго на пяць гадоў, і гэта пры добрым сцэнары.

Сусветны банк

Паводле звестак Сусветнага банка, у 2010 годзе сярэдняя чаканая працягласць жыцця беларуса — 70,4 года. Апошнія звесткі ў іх за 2018 год, тады нованароджаны беларус павінен быў пражыць 74,1 года. Як бачым, і тут рост зусім не ў чатыры разы.

Белстат

А што паведамляе наш дзяржаўны Нацыянальны статыстычны камітэт? Паводле яго звестак, у 2010 годзе сярэдняя працягласць жыцця таксама была 70,4 года. Звестак за 2020 год яшчэ няма, але ў 2019 годзе чаканая працягласць жыцця склала 74,5 года. Рост усяго на чатыры гады.

А што ў суседзяў?

Паводле звестак таго ж ААН і Сусветнага банка — Беларусь у рэйтынгу працягласці жыцця знаходзіцца паміж краінамі Балтыі, дзе працягласць жыцця вышэйшая, і Украінай з Расіяй, дзе працягласць жыцця ніжэйшая. У той жа Літве сярэдняя працягласць жыцця за 2020 год паводле звестак ААН — 76,1 года, а ў Расіі 72,7.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.