У Беларусі ад урагану пацярпелі 36 чалавек, 7 з іх шпіталізаваныя

Міністэрства па надзвычайных сітуацыях падлічыла страты, якія 13 ліпеня нанесла стыхія 26 раёнам Віцебскай, Мінскай, Гродзенскай, Магілёўскай і Гомельскай абласцей, а таксама сталіцы. Агулам пацярпелі 510 населеных пунктаў. Дахі пашкоджаныя ў 622 жылых дамах, а таксама ў 108 іншых будынках. Адзначаецца, што парывы ветру дасягалі 21 метра за секунду. У Чэрвеньскім і Смалявіцкім раёнах Мінскай вобласці зваліліся дзве воданапорныя вежы. Без электрычнасці па краіне былі 1126 населеных пунктаў, інфармуе прэс-служба МНС.

Было зафіксавана 4250 выпадкаў падзення дрэваў, з іх у Мінску — больш за 3600. У 447 выпадках дрэвы падалі на аўтамабілі. Па меддапамогу звярнуліся 36 чалавек. 7 з іх былі шпіталізаваныя.

Быў парушаны рух цягнікоў на асіповіцкім і баранавіцкім кірунках, паколькі адключылася электраэнергія. Адбылося спыненне 26 цягнікоў. Давялося выкарыстоўваць лакаматывы на дызельнай цязе.

З-за аварыі ў Мінску 9 гадзін без вады былі жыхары Ленінскага, Завадскога, Кастрычніцкага і Партызанскага раёнаў.  У Нацыянальным аэрапорце Мінск былі пашкоджаныя 8 самалётаў, прычым 3 з іх — сур'ёзна.

Хроніка: Усе жахі мінскага ўрагану (фота і відэа)

Фота: БЕЛТА