Сусветны банк палепшыў эканамічны прагноз па Беларусі

Сусветны банк палепшыў прагноз па эканоміцы Беларусі і мяркуе, што сёлета наша эканоміка вырасце на 1,2%. Пра гэта гаворыцца ў аглядзе структуры па Еўропе і Цэнтральнай Азіі.

У 2025 годзе, на думку экспертаў Сусветнага банку, ВУП Беларусі павялічыцца на 0,7%.

У студзені спецыялісты банка ацэньвалі сёлетнюю перспектыву росту беларускай эканомікі толькі ў 0,8%. Аднак нават яе паляпшэнне ўсё адно азначае чаканне стагнацыі эканомікі Беларусі.

Эксперты банка прагназуюць інфляцыю па выніках года на ўзроўні 7,4% (у Міністэрстве антыманапольнага рэгулявання і гандлю спадзяюцца, што будзе "не вышэй за 6%"). У 2025 годзе інфляцыя ў Беларусі знізіцца да 6,1%, мяркуюць у Сусветным банку.

Экспарт тавараў і паслуг з Беларусі, на думку аўтараў агляду, вырасце на 3,2%. Гэта менш, чым мэтавыя паказчыкі беларускага ўрада.