Студэнта-палітвязня Арцёма Баярскага адлічылі з БДУ

З хімічнага факультэта БДУ адлічылі студэнта-другакурсніка Арцёма Баярскага, пішуць праваабаронцы "Вясны". 

Хлопцу 19 гадоў, ён чатыры разы быў стыпендыятам спецыяльнага фонду прэзідэнта па падтрымцы таленавітай моладзі і адораных студэнтаў і навучэнцаў. 

Увосень 2020-га ён атрымаў 15 сутак за ўдзел у несанкцыянаваным мерапрыемстве. Сёёлета ўвесну яго спярша асудзілі на 25 сутак паводле таго самага артыкула 24.23, а потым выставілі абвінавачванні ў "стварэнні альбо кіраванні экстрэмісцкім фармаваннем" — цяпер у Беларусі пад гэтае вызначэнне трапляюць паблікі ў сацсетках і чаты ў Telegram.  

У ТГ-канале Азаронка з'явілася відэа, на якім Баярскі прызнаецца ў адміністраванні пабліка ў сацсетках. Пазней ён сказаў адвакату, што для атрымання гэтага прызнання яго білі дубінкамі па спіне і ягадзіцах.

Праваабаронцы прызналі яго палітвязнем.

4 чэрвеня стала вядома, што Баярскага адлічылі з Белдзяржуніверсітэта.

Напярэдадні, як расказвала Еўрарадыё, з факультэта прыкладной матэматыкі і інфарматыкі БДУ былі адлічаныя студэнты Вольга Вайтовіч і Савелій Дубовік.