Спявачка Агурбаш, выдачы якой патрабуе Мінск, не звярталася да Пуціна

Спявачка Анжаліка Агурбаш, выдачы якой патрабуе Мінск, не звярталася да расійскага прэзідэнта Уладзіміра Пуціна. Пра гэта яна заявіла ў эфіры Еўрарадыё. Агурбаш абурылася, што некаторыя СМІ паведамілі пра яе зварот да Пуціна. "Але калі будзе магчымасць, звярнуся, — кажа спявачка. — Папрашу дапамогі для ўсяго беларускага народа".

Анжаліка Агурбаш мае расійскі пашпарт. Пра тое, што ў дачыненні да яе распачалі ў Беларусі крымінальную справу, яна даведалася некалькі тыдняў таму, але не агалошвала гэта да мінулай пятніцы.

"Я ўжо нічога не баюся, — кажа спявачка. — Я падтрымлівала братоў і сясцёр-беларусаў увесь гэты год, як магла".

Агурбаш падкрэсліла: трэба спыніць рэпрэсіўную машыну ў Беларусі.