Пуціну патлумачылі, дзе межы Расіі — #ІхНоравы

Тэйлар Свіфт прыляцела з Японіі ў ЗША, каб паспець на гульню свайго кавалера Трэвіса Келсі ў Суперкубку і залпам выпіла куфаль піва (не паўтарайце, калі вам няма васямнаццаці!). А ў Рыа пачаўся карнавал. Калі вы думалі, што ў свеце не засталося для вас добрых навін — часцей чытайце нашы агляды.

Карта Мангольскай імперыі

Фаварыт сацсетак сёння — былы мангольскі прэзідэнт Цахіягійн Элбэгдорж. Ён таксама паглядзеў інтэрв'ю Уладзіміра Пуціна для амерыканскага журналіста Такера Карлсана і таксама трошкі... здзівіўся.

Спадар Элбэгдорж вырашыў нагадаць, дзе былі межы Расіі ў часы існавання Мангольскай імперыі. Карта XV стагоддзя ў выкананні манголаў Пуціну наўрад ці спадабаецца (на ўсялякі выпадак былы лідар Манголіі прыклаў яе да свайго твіту).

Але "забіраць сваё" манголы не збіраюцца:

— Не хвалюйцеся, мы мірная і вольная нацыя.

Мы ўжо расказвалі вам, як Пуцін памыліўся на трыста гадоў, спрабуючы апісаць гісторыю Вялікага Княства Літоўскага (на ўсялякі выпадак прачытайце, каб не блытацца ў беларускай гісторыі, як расійскі прэзідэнт).

Барацьба з карупцыяй

Ёсць адна краіна, у якой доўга-доўга змагаліся з карупцыяй, але так яе і не перамаглі. А вось і не адгадалі — гэта Кітай.

Спачатку з карупцыяй змагаліся пры старшыні Мао. Тады ідэя была такая, што яе можна выкараніць, выхоўваючы любоў да партыі. У наступным перыядзе вырашылі, што людзі перастануць красці, калі даць ім лепшае жыццё.

Зараз барацьба з карупцыяй — фішка кіраўніка КНР Сі Цзіньпіна. Ляцяць галовы нават высокіх чыноўнікаў — напрыклад, міністра абароны, які яшчэ гэтым летам прыязджаў пабачыцца з Аляксандрам Лукашэнкам.

"Сі, магчыма, параноік у дачыненні да карупцыі на вышэйшым узроўні, але ягоны страх — не трызненне. Карупцыя, якой ён баіцца, безумоўна, рэальная. Але праўда, вядома, і тое, што Сі Цзіньпін выкарыстаў рэпрэсіі для атрымання палітычнай перавагі", — цытуе ВВС кіраўніка аддзела кітаязнаўства ў амерыканскім універсітэце штата Джорджыя Эндру Ведэмана.

А якія яшчэ знакамітыя змагары з карупцыяй прыходзяць вам у галаву? Калі ёсць ідэі, як усё ж яе перамагчы, таксама дзяліцеся.

Зноў суп

Актывісты-эколагі аблілі яшчэ адну карціну супам — гэтым разам дасталася "Вясне" Клода Манэ. Карціна вісела сабе ў музеі прыгожых мастацтваў у Ліёне, але экаактывісты дабраліся і туды.

Манэ напісаў сваю карціну ў канцы XIX стагоддзя — прыблізна тады навукоўцы ўпершыню загаварылі пра тое, што выкіды парніковых газаў могуць паўплываць на наш клімат. Але Манэ наўрад ці здагадваўся тады, што глабальнае пацяпленне закране не толькі нашу агульную, але і яго "Вясну".

Актывістаў арыштавалі. Паліцыянты бязлітасна напісалі ў Твітары: "Ніякая прычына не апраўдвае напад на твор мастацтва, спадчыну французаў".

Два тыдні таму экаактывісты пляснулі супам у "Мону Лізу" Леанарда Да Вінчы.

Танцуй!

Пра добрыя навіны — у Рыа-дэ-Жанэйра пачынаецца карнавал! У нядзелю вечарам шэсць лепшых школ самбы Рыа прайшлі маршам па адмыслова збудаванай для карнавала зоне — Самбадрому Маркіза дэ Сапукаі.

Тэрмінова глядзіце, як гэта было.