Прабегі за Лукашэнку, "ябацькінгі", пікеты ля амбасад — усюды адны і тыя людзі
Тыповы "ябацькінг" / "УКантакце"
23 і 24 сакавіка прыхільнікі дзейных уладаў пікетавалі амбасады ЗША, Украіны, Літвы і Польшчы ў Мінску. Яны патрабавалі не ўмешвацца ва ўнутраныя справы Беларусі. Заадно дасталося Паўлу Латушку, Святлане Ціханоўскай і іншым апанентам Лукашэнкі.
Прыгледзеўшыся да ўдзельнікаў пікетаў, Еўрарадыё зноў убачыла знаёмыя твары.
Аказваецца, адны і тыя людзі ходзяць на праўладныя мітынгі, аўтапрабегі ў падтрымку Лукашэнкі, сядзяць на трыбунах, калі ён гуляе ў хакей і катаецца на лыжах. Хто яны — актыўныя ўдзельнікі "ябацькінгаў", якія з'яўляюцца то тут, то там?
Асцярожна: на фота ў тэксце экстрэмальна высокая канцэнтрацыя кіслотных колераў.
Юлія Уласава і Наталля Гулідава
Першая наша гераіня — Юлія Уласава. Прынамсі, яна так падпісаная ў сацсетках. 24 сакавіка яна была сярод тых, хто пікетаваў амбасаду Літвы.
На наступным фота побач з Юліяй Наталля Гулідава. Сяброўкі часта аказваюцца там, дзе намячаюцца "лутынгі".
А вось актывісткі Гулідава і Уласава разам з Лукашэнкам. Мы знайшлі фота, на якіх яны атрымліваюць зарад бадзёрасці і рашучасці. Прычым ва Уласавай рэгулярна атрымліваецца падабрацца ўшчыльную да кіраўніка Беларусі.
Сяргей Гамолка, Аляксандр Лявонаў і Максім Салдаткін
Сяргей Гамолка, Максім Салдаткін і Аляксандр Лявонаў пастаянна прысутнічаюць на праўладных мітынгах. Амаль заўсёды яны прыходзяць на іх утрох. Так было і 24 сакавіка, калі "неабыякавыя грамадзяне" пікетавалі амбасаду Літвы ў Мінску. Сяргей Гамолка — з перакрэсленай свастыкай, Аляксандр Лявонаў — са сцягам, Максім Салдаткін — на другім плане, у шэрай куртцы:
Мяркуючы па фатаграфіях у сацсетках, Гамолка і Салдаткін — былыя вайскоўцы.
Лявонаў і Гамолка ўжо не першы раз пікетуюць заходнія амбасады. Вось яны побач з амбасадай Літвы ў Мінску ў верасні 2020-га:
А вось тая самая тройца ў "ланцугу салідарнасці" ва Уруччы:
Аляксандр Лявонаў — заўзяты прыхільнік не толькі Лукашэнкі, але і Сталіна, і "рускага свету".
Сцюша Тайм і Дзмітрый Белякоў
Пікетаваць амбасаду Літвы прыйшлі "інфлюэнсеры" — блогеры Сцюша Тайм і Дзмітрый Белякоў. Сцюша на ўсю моц расхвальвае сілавікоў і Лукашэнку ў TikTok і ў інстаграме. А паралельна супрацоўнічае з тэлеканалам СТБ.
Дзяўчына сцвярджае, што для паходу да літоўскай амбасады прыхільнікі Лукашэнкі "самаарганізаваліся ў інтэрнэце". Хоць, напрыклад, пасля пікета каля амбасады Украіны яго ўдзельнікі арганізавана прайшлі да найбліжэйшага офіса Беларускага рэспубліканскага саюза моладзі.
Сцюша прысутнічала на праўладных мітынгах і раней.
А вось і блогер Дзмітрый Белякоў, які нядаўна збіраўся стварыць у Беларусі прарасійскую партыю "Адзіная Айчына". Ён таксама ходзіць на пікеты да амбасад.
На гэтым фота сабраны амаль увесь мінскі "актыў" прыхільнікаў Лукашэнкі. Белякоў — чацвёрты злева ў ніжнім шэрагу.
Людміла Ігнатава
Карыстальнікі фэйсбука заўважылі, што некаторыя ўдзельнікі праўладных пікетаў — акторы, якія здымаюцца на "Беларусьфільме" ў масавых сцэнах. Іх можна ўбачыць не толькі каля амбасад у Мінску, але і ў расійскіх серыялах!
У Еўрарадыё атрымалася знайсці пацвярджэнне гэтаму назіранню. Адна з тых, хто пікетаваў амбасаду Польшчы, — Людміла Ігнатава. Яна расказала нам, што заўсёды (на ўсялякі выпадак) носіць з сабой дзяржаўны сцяг Беларусі. А да польскай амбасады прыйшла ад амбасады Літвы, дзе некалькі хвілін таму ўдзельнічала ў аналагічным пікеце.
А вось фота з профілю Ігнатавай ва "УКантакце": яна сапраўды ўдзельнічае ў здымках.
Павел Чарняўскі
Мужчыну гадоў трыццаці, які пікетуе амбасаду Польшчы ў Мінску, завуць Павел Чарняўскі. Ён лічыць, што еўрапейскія дыпламаты ціснуць на беларускую судовую сістэму, наведваючы суды над палітвязнямі. І рэгулярна публікуе ў сваіх сацсетках фота і відэа з праўладных мітынгаў.
У жніўні хлопец неаднаразова ўдзельнічаў у аўтапрабегах у падтрымку Лукашэнкі, восенню яго натхняла зафарбоўванне БЧБ-сцягоў на будынках. 25 кастрычніка Чарняўскі шпацыраваў міма аўтазакаў, здымаў буйным планам іх колы і кузавы, махаў чырвона-зялёным сцяжком і дзякаваў сілавікам: "Дзякуй, хлопцы. Я здымаю не для гэтых. Я і сам такі, як і вы. Дзякуй!"
Мяркуючы па профілях у сацсетках, Павел быў сябрам праўлення дабрачыннага праекта "Дары Надзею", бываў у арабскіх краінах, цікавіцца зброяй. Сярод яго сяброў у фэйсбуку — прэс-сакратары Міністэрства абароны, Следчага камітэта і ўрада Беларусі.
Гэтыя ж людзі кажуць словы ўдзячнасці міліцыі
Еўрарадыё звярнула ўвагу на яшчэ адну актыўнасць заўсёднікаў праўладных мітынгаў. Яны запісваюць відэа, на якіх хваляць мінскую міліцыю. Апошнім часам такія ролікі рэгулярна з'яўляюцца ў сацыяльных сетках — напрыклад, на старонцы "Мінская міліцыя" ў фэйсбуку.
Напрыклад, "жыхар Цэнтральнага раёна г. Мінска Павел Юр'евіч дзякуе супрацоўнікам Цэнтральнага РУУС за мір і спакой у раёне". Гэта знаёмы нам Павел Чарняўскі — відаць, на сваім рабочым месцы:
Тут жа — маналог мінчанкі Наталлі — ужо знаёмай нам Наталлі Гулідавай.
Нам удалося знайсці дзясятак такіх ролікаў, апублікаваных у сакавіку. Ёсць адчуванне, што мінская міліцыя мэтанакіравана працуе, каб змяніць імідж "карнікаў", які склаўся ў яе апошнім часам у сацсетках. Толькі вось сярод ахвотных падзякаваць ёй за працу — не, не ды і трапляюцца людзі з усё таго самага "актыву", які вандруе з аднаго мітынгу ў падтрымку дзейных уладаў на другі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.