Пасля дваровага канцэрту ў Менску зноў затрымалі музыкаў

Барабаншчыкаў з гурта "Патрабуем разысціся" затрымалі ўвечары ў сераду ў двары абутковага магазіна "Прамень" на вуліцы Ціміразева, паведамляюць праваабаронцы. Музыкаў з гэтай групы можна было бачыць на пратэстных маршах.

"Затрыманыя больш за 10 чалавек. Сярод затрыманых — барабаншчыкі з групы" Патрабуем разысціся ". Таксама сёння затрымалі музыкаў у Малінаўцы і Сухарава", — гаворыцца ў паведамленні пазбаўленага рэгістрацыі праваабарончага цэнтра "Вясна".

У Сухарава быў затрыманы Ціматэ Суладзе, у Малінаўцы — Мікіта Камянецкі. Камянецкага, паводле звестак праваабаронцаў, сілавікі выцягнулі з таксі, на якім ён планаваў ехаць дадому пасля дваровага канцэрту. Яго павезлі ў Маскоўскае РУУС.

Музыкаў, якія граюць дваровыя канцэрты, затрымлівалі і раней. У аўторак 3 лістапада сілавікі забралі ў аддзяленне удзельнікаў канцэрта каля ўніверсама "Рыга". Былі затрыманыя музыкі з гуртоў Vuraj, TonqiXod і Irdorath, Dee Tree, а таксама літаратары Сяржук Мядзведзеў і Аляксандр Белік.

Восем сутак адміністрацыйнага арышту ў верасні атрымаў музыка Аляксандр Памідораў. Яго забралі пасля канцэрту ў лесапарку каля вуліцы Ангарскай.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.