Пад заваламі ў Японіі нашлі 90-гадовую жанчыну, якая выжыла ў землятрусе
Наступствы землятрусу ў Японіі / Reuters
Дзевяностагадовая жанчына была знойдзена жывой пад заваламі праз пяць дзён пасля трагічнага землятрусу, які адбыўся ў Японіі.
Ратавальнікі знайшлі яе сярод абломкаў двухпавярховага дома ў горадзе Сузу. Жанчына прыйшла ў свядомасць, піша BBC.
Першыя 72 гадзіны для ратавальнікаў лічацца крытычнымі, таму што пасля гэтага шанцы знайсці людзей жывымі значна зніжаюцца.
Землятрус магнітудай 7,5 адбыўся ў панядзелак на ўзбярэжжы Японскага мора. Ён зруйнаваў гарады на аддаленай паўвыспе Нота. Больш 120 чалавек загінулі, 200 зніклі без весткі.
