На мяжы Польшчы і Беларусі з'явіцца радыёэлектронная загарода
На польска-беларускай мяжы / twitter.com/Straz_Graniczna
На мяжы Польшчы і Беларусі з'явіцца радыёэлектронная загарода. Польская памежная служба плануе яе стварыць на памежных рэках. Ужо падпісаныя кантракты. Падрадчыкі маюць 10-12 месяцаў для выканання задачы. На праект выдаткавана больш за 364 млн злотых (амаль $92 млн). Сярод іх ёсць і сродкі ЕС, паведамляе strazgraniczna.pl.
Даўжыня электроннага бар'ера на рацэ Буг складзе каля 172 км. Там усталююць каля 1800 відэакамер, каля 4500 дзённа-начных і цеплавізійных камер, а таксама спецыяльныя датчыкі, якія "забяспечваюць выяўленне розных фізічных характарыстык аб'ектаў".
Электронны бар’ер на рэках Свіслач і Істочанка будзе складаць каля 47 кіламетраў. На 500 слупах усталююць тысячу дзённа-начных і цеплавізійных камер, а таксама датчыкі.
Радыёэлектронная загарода будзе інтэграваная ва ўжо існуючую памежную інфраструктуру. Пры гэтым улічваецца рэльеф мясцовасці, каб выключыць існаванне "мёртвых зон".
Адзначаецца, што ўзмацненне аховы мяжы адбываецца і для барацьбы з нелегальнай міграцыяй, і для спынення кантрабанды.
