Лондан анансаваў вылучэнне найбуйнейшага пакета вайсковай дапамогі для Украіны

Вялікабрытанія анансавала вылучэнне найбуйнейшага пакета вайсковай дапамогі для Украіны на 500 мільёнаў фунтаў стэрлінгаў (гэта больш за 617 млн долараў). Гэтыя сродкі павінны забяспечыць пастаўкі на фронт боепрыпасаў, ракет і дронаў, піша Hromadske са спасылкай на брытанскі ўрад.

Дроны закупяць у Вялікабрытаніі. Мінабароны гэтай краіны таксама дашле сродкі для адбіцця нападу на сушы, у моры і ў паветры. Мяркуецца, што Украіне будуць перададзеныя:

• 60 лодак, у тым ліку рэйдавыя і вадалазныя катэры, а таксама марскія гарматы; 
• больш за 1600 ударных і супрацьпаветраных ракет, а таксама дадатковыя ракеты вялікай далёкасці Storm Shadow; 
• больш за 400 адзінак тэхнікі, з іх 160 абароненых транспартных сродкаў Husky, 162 бронемашыны і 78 усюдыходаў;
•  амаль 4 мільёны патронаў да стралковай зброі.

Чакаецца, што прэм'ер-міністр краіны Рышы Сунак абвесціць аб выдзяленні дапамогі сёння падчас візіту ў Польшчу. Там пройдуць ягоныя перамовы з польскім калегам Дональдам Тускам, яны будуць казаць пра паглыбленне двухбаковых стасункаў. Пытанне еўрапейскай бяспекі і падтрымкі Украіны кіраўнікі ўрадаў Вялікабрытаніі і Польшчы абмяркуюць на сустрэчы з генеральным сакратаром NATO Енсам Столтэнбергам.

Нагадаем, у канцы мінулага тыдня за вылучэнне дапамогі Кіеву прагаласавала Палата прадстаўнікоў амерыканскага Кангрэса.