Кіраўнік МЗС Літвы заклікаў за падзеямі ва Украіне не забываць пра беларусаў

Падчас вайны ва Украіне не варта забывацца на грамадзянскую супольнасць беларусаў. Пра гэта заявіў міністр замежных спраў Літвы Габрыэлюс Ландсбергіс.

Напярэдадні другой гадавіны пратэстаў у Беларусі ён сустрэўся 8 жніўня з Святланай Ціханоўскай ды іншымі прадстаўнікамі грамадзянскай супольнасці і апазіцыі, піша delfi.lt.

"Як і два гады таму, сёння краіна мае патрэбу ў падтрымцы дэмакратычнага свету. Беларусь, якая імкнецца да свабоды, павінна заставацца на парадку дня як літоўскай, так і міжнароднай палітыкі. Я веру, што згуртаваныя намаганні дэмакратычных сіл Беларусі і ўсіх нас дапамогуць рэалізаваць галоўную мэту — як мага хутчэй правесці дэмакратычныя выбары ў краіне", — заявіў кіраўнік літоўскай дыпламатыі. 

Паведамляецца, што падчас сустрэчы таксама абмяркоўвалася тэма палітвязняў, якія знаходзяцца ў беларускіх турмах. 

Ландсбергіс падтрымаў памкненне беларусаў супрацьстаяць ўдзелу афіцыйнага Мінску ў расійскай агрэсіі супраць Украіны. Таксама ён выказаў падтрымку беларусам, якія супраціўляюцца намаганням Крамля знішчыць незалежнасць Беларусі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.