Карціны, якія належаць Белгазпрамбанку, канфіскавалі з музея Суціна ў Смілавічах
Як выглядае зала Шрагі Царфіна пасля адабрання карцін / Святлана Хасяневіч
Сярод твораў мастацтва, адабраных фінансавай міліцыяй у рамках "справы Белгазпрамбанка", апынуліся пяць карцін Шрагі Царфіна з музея Хаіма Суціна ў Смілавічах. Пра гэта Еўрарадыё расказала дырэктар музея Ала Лаўрыновіч:
"КДК забраў пяць карцін з карпарацыйнай калекцыі Белгазпрамбанка, якія выстаўляліся ў музеі. Яшчэ пяць карцін Царфіна засталіся — іх Белгазпрамбанк падарыў музею ў калекцыю. Яны належаць музею, таму іх пакінулі.
Гэта вялікі ўдар для экспазіцыі музея, бо людзі прыязджаюць паглядзець на работы вялікага беларускага мастака".
Следчыя далучылі да матэрыялаў "справы Белгазпрамбанка" каля 150 карцін. Іх агульны кошт ацэньваецца ў $20 млн. Сярод іх творы беларускіх прадстаўнікоў Парыжскай школы Хаіма Суціна, Марка Шагала, Шрагі Царфіна.
Сярод адабраных карцін — "Ева" Хаіма Суціна. Яна таксама ўваходзіць у карпарацыйную калекцыю Белгазпрамбанка. У 2013 годзе банк набыў яе на аўкцыёне Sotheby's за 1 мільён 805 тысяч долараў. Пасля таго як карціна апынулася ў руках у сілавікоў, яна стала сімвалам пратэставага флэшмобу.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
