Форвард Лапцеў выведзены са складу футбольнай зборнай “за парушэнне рэжыму”

Форвард Дзяніс Лапцеў выведзены са складу зборнай Беларусі па футболе. Пра гэта паведаміў галоўны трэнер нацыянальнай каманды Ігар Крывушэнка. Ён кажа, што Лапцева выключылі з каманды за парушэнне рэжыму перад матчам са шведамі.

“Што тычыцца шэрагу іншых футбалістаў, прозвішчы якіх былі згаданыя ў прэсе, да іх ёсць прэтэнзіі выключна маральнага кшталту, аднак дысцыплінарных санкцыяў у дачыненні да іх не будзе”, — цытуе Крывушэнку by.tribuna.

Як стала вядома раней, увечары 1 верасня нацыянальная каманда правяла лёгкую трэніроўку, пасля чаго гульцоў адпусцілі да абеду наступнага дня. Назаўтра раніцай форвард салігорскага “Шахцёра” і гулец зборнай краіны Дзяніс Лапцеў быў у стане, мала сумяшчальным з выступам за зборную краіны. Крывушэнка ацаніў стан гульца і фактычна адразу яго адлічыў.

Тым жа вечарам 1 верасня чацвёра футбалістаў былі заўважаныя ў сталічным піўным рэстаране “Гамбрынус”. Гэта паўабаронца “Нёмана” Павел Савіцкі, абаронца брэсцкага “Дынама” Дзмітрый Алісейка, паўабаронца кіеўскага “Дынама” Мікіта Корзун і форвард мінскага “Дынама” Антон Сарока. Гульцы заяўляюць, што не замаўлялі алкаголь.