Фактчэк: у Беларусі будуць шыць форму і абутак для салдат Пуціна

Рускі вайсковец / t.me/Ministerstvo_oborony

У сеціве распаўсюджваюцца чуткі пра тое, што некаторыя беларускія прадпрыемствы атрымалі заказы шыць форму і абутак для салдат Пуціна.

— У абедзенны перапынак зайшоў дырэктар нашай кампаніі і выдаў навіну: паступіла распараджэнне ад міністра лёгкай прамысловасці і ад кагосьці з Мінабароны шыць форму і берцы для расіян. Па тэрмінах не сказаў, але, магчыма, ужо ў кастрычніку, — публікуе паведамленне чытача тэлеграм-канал "Беларусь головного мозга".

Там жа паведамляюць, што заказы паступілі на прадпрыемствы "Отыка", "Праца" і "Бяспека працы""паколькі яны падпарадкоўваюцца Беллегпраму".

Работнікі гэтых прадпрыемстваў усё адмаўляюць.

— Такога няма наогул, не было ў нас заказаў ад войска Расійскай Федэрацыі, — кажуць Еўрарадыё ў камерцыйным аддзеле фабрыкі "Отыка", прадстаўніцтва якой працуе і ў Расіі.

— Можа быць, вы атрымлівалі заказ ад Міністэрства абароны Беларусі?

— Тэндарныя рассылкі ад Мінабароны мы атрымлівалі, але не ўдзельнічаем.

— Гэта значыць, вы наогул не шыеце абутак для вайскоўцаў?

— Я не магу зразумець, пра што гаворка.

— Гаворка пра абутак для расійскіх вайскоўцаў.

— Не, такіх заказаў на "Отыка" няма.

— А калі атрымаеце такі заказ, будзеце выконваць?

— Не магу вам сказаць, рашэнне будзе прымаць кіраўніцтва.

А вось што нам расказваюць у ААТ "Праца".

— Такога ў нас няма.

— Сто адсоткаў?

— Так, мы працуем толькі з Беларуссю.

— А ад Мінабароны Беларусі атрымлівалі заказ? Можа быць такое, што нашы вайскоўцы заказалі ў вас абутак, каб падзяліцца з расіянамі?

— Не-не, з Мінабароны таксама не працуем, у нас толькі прамысловасць.

Адказаць на пытанне, ці будзе прадпрыемства шыць абутак для расійскіх салдат, калі заказ усё-ткі паступіць, тут таксама не змаглі.

ТАА "Бяспека працы" спецыялізуецца на пастаўках спецадзення, форменнага і рабочага адзення, спецабутку і СІА.

Тут мужчына, які прадстаўляецца менеджарам па продажах, кажа, што мы пытаемся пра "нейкую лухту" і ён "не думае, што гэта праўда", а потым тут жа адказваюць, што ўсё гэта "няпраўда", прынамсі, ён нічога не чуў пра такія заказы.

Еўрарадыё паспрабавала ўдакладніць, ці можа нехта ў кампаніі даць больш канкрэтны адказ на наша пытанне, але суразмоўца пажадаў не ісці наверх і "не разводзіць паніку" на падставе чутак, якія захацелі праверыць журналісты.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.