ЕС усклаў адказнасць за гібель Рамана Бандарэнкі на беларускія ўлады
Віна за гібель Рамана Бандарэнкі ляжыць на беларускіх уладах. Пра гэта гаворыцца ў заяве прэс-службы Жазэпа Барэля, кіраўніка дыпламатыі Еўрасаюза.
Смерць Рамана Бандарэнкі, як гаворыцца ў дакуменце, стала "абуральным і ганебным вынік дзеянняў беларускіх уладаў, якія не толькі непасрэдна і гвалтоўна праводзілі рэпрэсіі супраць уласнага насельніцтва, але і стварылі абставіны, у якіх могуць адбывацца такія беззаконныя гвалтоўныя дзеянні".
Еўрасаюз чакае ад беларускіх уладаў, каб яны спынілі гвалт і пераслед, неадкладна вызвалілі самавольна затрыманых людзей, у тым ліку палітвязняў. Акрамя таго ЕС настойвае на поўным і празрыстым расследаванні ўсіх парушэнняў правоў чалавека і злоўжыванняў, а таксама заклікае прыцягнуць вінаватых да адказнасці. Еўрасаюз нагадвае, што пад санкцыямі знаходзяцца 55 прадстаўнікоў беларускага кіраўніцтва, адказных за рэпрэсіі ды запалохванне, і гэты спіс можа павялічыцца.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.