Дабраліся рукі Крамля? Чаму ў Італіі зноў разгарэўся палітычны крызіс

19/07/2022 - 11:14

Прэм'ер-міністр Італіі Марыа Драгі / AP

Прэм'ер-міністр Італіі Марыа Драгі — адзін з нефармальных лідараў Еўрасаюза. Канцлер ФРГ Олаф Шольц уступіў на пасаду нядаўна, французскі прэзідэнт Макрон з цяжкасцю выйграў выбары, а вось Драгі карыстаецца ва ўсёй супольнасці аўтарытэтам. Ён дасведчаны кіраўнік, доўга ўзначальваў спачатку Банк Італіі, а потым — Еўрапейскі цэнтрабанк. У прэм'ерскім крэсле ён крыху больш за год — але ўжо можа яго страціць. Расійскія прапагандысты заяўляюць, што рэч у падтрымцы Італіяй Украіны і наогул "не было чаго лезці". Што на самай справе і чаму адбываецца ў трэцяй эканоміцы Еўрасаюза?

Хоча сысці, але просяць застацца

Насуперак таму, што кажуць крамлёўскія прапагандысты, палітычная будучыня Драгі апынулася пад пытаннем зусім не праз знешнюю палітыку. Роўна наадварот: у кааліцыі адбылася сур'ёзная спрэчка праз планы дзеянняў у эканоміцы.

На галасаванні па вотуме даверу новым мерам у эканоміцы партнёры Драгі па кааліцыі, папулісцкі рух "Пяці зорак", не падтрымалі яго ідэі па зніжэнні кошту жыцця для сем'яў. Нават без галасоў папулістаў ухваленне парламента было атрыманае, аднак Драгі заявіў, што яму патрэбна поўная падтрымка ўсіх партнёраў.

Як свой учынак растлумачылі ў "Пяці зорках" (дарэчы, узначаленых экс-прэм'ерам Джузэпэ Контэ)? Там кажуць: маўляў, з кааліцыі мы не выходзім, але патрабуем гарантый рэалізацыі нашых прыярытэтаў — напрыклад, мінімальнай заработнай платы.

Пасля гэтага Драгі падаў прашэнне аб адстаўцы, але прэзідэнт Італіі яго не прыняў. Зноў пытанне будзе вырашацца ўжо на гэтым тыдні. Хоць Драгі заяўляе, што яму для працы патрабуецца максімальная падтрымка з боку ўсіх партнёраў, а без яе ён вымушаны сысці, многія просяць яго застацца.

З заклікам да Драгі затрымацца на пасадзе прэм'ер-міністра ўжо выступілі прадстаўнікі буйнога бізнесу і мэры больш чым сотні гарадоў Італіі. У адваротным выпадку давядзецца прызначаць датэрміновыя выбары. Але асноўная праблема не ў гэтым, а ў тым, што тады ўлады не змогуць дзейнічаць рашуча ў часе пандэміі, вайны ва Украіне і энергетычнага крызісу. Гэта не кажучы пра яго лідарскую ролю ў Еўрасаюзе.

"Роля Драгі ў Еўропе — самая важкая прычына для Драгі застацца", — заявіў італьянскі дэпутат Стэфана Чэканці.

Раскол у папулістаў

"Гульню" супраць Драгі і яго планаў рух "Пяці зорак" пачаў у часе сур'ёзных унутраных праблем. У чэрвені партыю пакінуў кіраўнік МЗС Луіджы Дзі Маё: ён абвінаваціў ужо былых аднапартыйцаў у спробах сарваць аказанне дапамогі Украіне і аслабіць ролю Італіі і Еўрапейскім саюзе.

"Мы абавязкова павінны былі выбраць, з якога боку гісторыі знаходзіцца — на баку Украіны, на якую напалі, або на баку агрэсара Расіі. Пазіцыі некаторых лідараў "Пяці зорак" могуць аслабіць нашу краіну", — заяўляў Дзі Маё.