Да і пасля: як Бэнксі змяніў самае сумнае дрэва Лондана — #ІхНоравы

18/03/2024 - 15:30

#ІхНоравы / @rubanau_collage

У Расіі прайшлі выбары, і цяпер усе думаюць, як называць Уладзіміра Пуціна. Калі вы ўвесь дзень чытаеце пра тое, сфальсіфікаваныя выбары ці не, а калі так, то як моцна — пераключыцеся на хвілінку і на навіны з іншых краін.

Голад у XXI стагоддзі

Больш за мільён жыхароў Газы сутыкаюцца з крытычным недахопам прадуктаў. Голад непазбежны. Ён можа пачацца ў любы момант з сярэдзіны сакавіка да траўня гэтага года.

Паўночныя правінцыі Газы практычна недаступныя для гуманітарных арганізацый. Там не хапае ежы і вады.

Няўрадавая арганізацыя Plan International, якая займаецца прасоўваннем правоў дзяцей, так пракаментавала гэтую справаздачу:

"Гэтая цалкам рукатворная катастрофа мусіць зрабіцца крыніцай ганьбы для міжнароднай супольнасці. Апраўданняў быць не можа: спыненне доступу да гуманітарнай дапамогі — відавочнае парушэнне міжнароднага гуманітарнага права. Голад цывільнага насельніцтва як метад вядзення вайны — незаконны і амаральны".

Раней кіраўнік дыпламатычнага ведамства ЕС Жазэп Барэль таксама абвінавачваў Тэль-Авіў у тым, што голад у Газе справакаваны Ізраілем наўмысна. Прадстаўнік жа Ізраіля сцвярджае, што краіна "спрыяе дастаўцы неабмежаванай колькасці дапамогі паветрам, сушай і морам".

Нікога не абвінавачваючы, падвядзём вынікі: больш за 1 мільён чалавек галадае проста цяпер. Ішоў 2024-ы год.

Тым часам у іншай частцы свету

А калі людзі не забываюць, што жывуць у XXI стагоддзі, яны вынаходзяць прыладу, якую можна змяшчаць у станік і адсочваць, ці расце пухліна малочнай залозы.

Прыладу распрацоўвае Інавацыйны цэнтр медыцынскіх тэхналогій Універсітэта Нотынгем Трэнт. Яна зможа вымяраць змены і рост пухліны ў рэальным часе з дакладнасцю да 2 мм.

Прыбор будзе выкарыстоўваць электрычныя імпульсы для сканавання і выяўлення маленькіх змяненняў у вадкасцях унутры і звонку клетак малочнай залозы.

Даследчыкі спадзяюцца, што гэта будзе новы неінвазіўны метад выяўлення пухліны. Пацыенты змогуць выкарыстоўваць яго не выходзячы з хаты.

Тут быў Бэнксі

Няўлоўны мастак стварыў новую карціну. Гэтым разам на сцяне дома на поўначы Лондана.

На сцяну ззаду дрэва з абрэзанымі галінкамі ён распыліў зялёную фарбу, якая сімвалізуе лісце. Адным словам, паказаў, што прырода змагаецца, і мы павінны ёй дапамагчы.

Жыхары вуліцы, на якой з'явіўся мурал, ужо ганарацца, што жывуць побач.

Здымак дрэва да і пасля сустрэчы з мастаком ужо з'явіўся ў яго Instagram-акаўнце.

До и после Бэнкси