Бюджэт Беларусі за 2018 год выкананы з прафіцытам больш за $2 мільярды
Бюджэт Беларусі за 2018 год выкананы з прафіцытам больш як 2 мільярды долараў у эквіваленце. Такую лічбу са словаў міністра фінансаў Максіма Ермаловіча паведамляе інфармагенцтва БЕЛТА.
"Гэта досыць высокія вынікі, гэта дазваляе нам з аптымізмам глядзець у будучыню, нягледзячы на тое, якое надвор'е будзе ў сусветнай эканамічнай сістэме", — пракаментаваў чыноўнік.
Асноўнымі фактарамі, якія дапамаглі дасягнуць стабільнасці, Ермаловіч назваў два — агульную эканамічную палітыку дзяржаўных органаў, а таксама ўзважаную і абдуманую бюджэтна-падатковую палітыку, накіраваную ў тым ліку на павышэнне эфектыўнасці кіравання дзяржаўнымі сродкамі.
Дарэчы, у законе аб бюджэце на 2018 год планавалася, што ён будзе выкананы з прафіцытам каля 734 мільёнаў рублёў (менш за 370 мільёнаў долараў).
