У Беларусі выкрылі "экстрэмісцкі" рэпост за тры дні да таго, як ён быў зроблены

У Беларусі выкрылі "экстрэмісцкі" рэпост за тры дні да таго, як ён быў зроблены. Міліцыянеры так захапіліся канвеерам рэпрэсій, што нарабілі памылак у пратаколе. "Наша ніва" знайшла яго ў банку судовых рашэнняў.

Кур'ёзны пратакол міліцыянеры склалі на 50-гадовага жыхара Дуброўна Андрэя Марачова, які працуе інжынерам-механікам на мясцовым ільнозаводзе. Яго двойчы запар судзілі за "дробнае хуліганства" — 7 і 26 сакавіка. Наступны суд адбыўся 8 красавіка. Згодна з яго пастановай, 31 сакавіка 2024-га мужчына зрабіў рэпост "экстрэмісцкіх матэрыялаў" на сваю старонку ў "Аднакласніках". Але міліцыянеры з Дубровенскага РАУС яго апярэдзілі і ўжо раніцай 28 сакавіка падчас "нечаканага" агляду старонкі Марачова знайшлі гэты рэпост. Дарэчы, старонка гэтая закрытая, таму, імаверна, сілавікі зайшлі на яе проста з тэлефона затрыманага. У выніку яго асудзілі яшчэ на трое сутак і канфіскавалі камп'ютар. Мяркуючы па раскладах судоў, чарговы суд над мужчынам адбыўся 25 красавіка.

Відавочна, што Андрэю Марачову міліцыя зладзіла "канвеер" адміністрацыйных судоў.