Выпускніца юрфаку Кацярына Віннікава асуджана на 15 сутак арышту
Выпускніца юрфаку БДУ Кацярына Віннікава асуджана на 15 сутак адміністрацыйнага арышту, паведамляе тэлеграм-канал @law_verum. Яе выступ на цырымоніі ўручэння дыпломаў ацанілі, як "несанкцыянаванае пікетаванне".
Справу Віннікавай разглядаў суд Ленінскага раёна Мінска (суддзя — Марына Клімчук). З Акрэсціна яе не прывозілі, яна была на сувязі праз скайп. Сваёй віны дзяўчына не прызнала. Дарэчы, міліцыянеры згадалі ў рапарце і чырвоны пояс на белай сукенцы выпускніцы. Высвятляецца, што гэта парушэнне!
Кацярына Віннікава на ўручэнні дыпломаў выпускнікам падзякавала ў тым ліку і звольненым выкладчыкам, палітвязню Максіму Знаку. Пасля ў яе ў інтэрнаце адбыўся ператрус, быў забраны ноўтбук, дзяўчыну затрымалі. У судзе яна падкрэсліла, што дзякавала людзям, якія "паўплывалі на яе станаўленне як чалавека і юрыста". "Не з мэтай публічнага выказвання палітычных інтарэсаў і нязгоды з затрыманнем Знака?", — спытала суддзя. "Не, не з мэтай", — адказала дзяўчына.
