У студзені ў Беларусі было прададзена ў 2,5 разы больш новых аўто, чым год таму
Аўтосалон Geely
Продажы новых аўтамабіляў у Беларусі растуць, канстатуюць эксперты Беларускай аўтамабільнай асацыяцыі (БАА). У студзені было прададзена 1882 машыны — гэта ў 2,5 разы больш, чым у студзені год таму.
Па словах экспертаў, пакупнікі аддаюць перавагу "вядомым маркам і наяўнасці надзейнага сэрвіснага абслугоўвання". Вядомыя маркі ў беларускім варыянце — гэта кітайскі Geely і расійская LADA. Кітайскі брэнд, які мае зборачную вытворчасць у Беларусі, застаецца безумоўным лідарам. На яго долю прыпадае 62% продажаў (у студзені было прададзена 1203 аўтамабіля). Таксама беларусы купілі 204 аўтамабілі LADA і 152 аўтамабілі яшчэ аднаго кітайскага брэнда Dongfeng.
З улікам сітуацыі на рынку і прыходу новых аўтамабільных брэндаў у БАА мяркуюць, што ў наступныя месяцы продажы таксама будуць расці.
