Сойм Літвы прапануе 2011 год зрабіць годам памяці Эміліі Плятэр

Камітэт па замежных справах Сойма Літвы прапануе абвясціць 2011 год годам памяці пра паўстанне 1831 года і Эміліі Плятэр, паведамляе delfi.lt

У ім падкрэсліваецца, што ў 2011 годзе спаўняецца 180 гадоў з дня паўстання 1831 года, "на якое аказалі уплыў рэвалюцыйныя рухі тых гадоў у Еўропе, а менавіта, у Францыі і Бельгіі, якое праявілася ў барацьбе патрыятычных сіл Літвы і Польшчы супраць прыгнятанняў у палітычным і грамадскім жыцці, уведзеных Царскай Расіяй, і ў спробе вызваліцца і аднавіць дзяржаўнасць Рэспублікі абодвух народаў".

Ураду было прапанавана скласці камісію, якая адказвае за ўшанаванне памяці паўстання 1831 года і Эміліі Плятэр, скласці дзяржаўную праграму ўшанавання і вылучыць сродкі з урадавага рэзервовага фонду на ўвасабленне яе ў жыццё.

У праекце гаворыцца, што ўдзельніца паўстання 1831 года, нацыянальная гераіня Літвы і Польшчы Эмілія Плятэр стала сімвалам гэтага паўстання, а само паўстанне ўвасобіла ў сабе імкненне барацьбы за свабоду і дзяржаўнасць.

Па словах аўтараў дакумента, гэта паўстанне адлюстроўвае гістарычную і культурную сувязь паміж Літвой і Польшчай, таму абвяшчэнне 2011 года ў памяць пра тыя падзеі павінна зрабіць культурнае супрацоўніцтва паміж Літвой і Польшчай больш актыўным.

У праекце не ўзгадваецца, што паўстанне адбывалася і на тэрыторыі Беларусі, а Эмілія Плятэр мае нейкае дачыненне да Беларусі. Між тым, бацька яе, граф Францішак Ксаверый, паходзіў са старажытнага нямецкага роду Плятэраў, а маці Ана Моль была з Браслава. Эмілія атрымала добрую хатнюю адукацыю. Нарадзілася ў Вільні, з 9 год да пачатку паўстання жыла на Віцебшчыне ў сваякоў, збірала і апрацоўвала беларускі фальклор. Пісала беларускія вершы. Як сведчаць сучаснiкi, Эмiлiя ўсёй душой iмкнулася да беларускага ладу і называла сябе "ліцвінкай", што не адпавядае сённяшняму паняццю "літовец".