У Віцебску прайшоў пікет у падтрымку Сяргея Каваленкі
Яго правяла жонка Сяргея Алена разам з старэйшым сынам Валянцінам і актывістамі "Еўрапейскай Беларусі".
Каля будынку драматычнага тэатру Алена трымала плакат "Свабоду Сяргею Каваленку!", сямігадовы Валянцін трымаў бацькаў партрэт з надпісам "Мой бацька памірае за сцяг. Чаму так?", а іншыя ўдзельнікі раздавалі ўлёткі. У іх была інфармацыя пра палітвязня, які цяпер знаходзіцца ў шпіталі пры калоніі "Віцьба-3" у цяжкім стане пасля працяглай галадоўкі.
Праз некалькі хвілін пасля пачатку акцыі з'явілася патрульная міліцэйская машына, і ўдзельнікі разышліся, паведамляе Радыё Свабода.
Нагадаем, актывіст КХП-БНФ Сяргей Каваленка ў лютым быў асуджаны Першамайскім судом Віцебска на 2 гады і месяц калоніі за парушэнне рэжыму адбыцця хатняй "хіміі" (яе яму прысудзілі за вывешаны на галоўнай ёлцы абласнога цэнтра бела-чырвона-белы сцяг).
Фота — svaboda.org