У Баранавіцкім раёне дзікі масава гінуць ад невядомай хваробы
Каля 150 жывёл загінула і было адстрэлена паляўнічымі.
Ва ўрочышчы Маляроўшчына, дзе раней было найбольш дзікіх звяроў і праводзілася валютнае паляванне для іншаземцаў, знайшлі адразу каля дзесяці мёртвых дзікоў. Яшчэ некаторая колькасць жывёл, палеглых ад невядомай хваробы, была знойдзена ў іншых месцах.
Баранавіцкі райвыканкам прыняў рашэнне аб адстрэле дзікоў “для правядзення маніторынга”. Цяпер паляўнічыя у 35-кіламетровай зоне ад вёскі Амневічы адстрэльваюць іх, бяруць мяса на аналізы , а тушы забітых і знойдзеных мёртвымі жывёл спальваюць у закінутых кар’ерах Душкаўцы і Масейкі. Ніякіх тлумачэнняў і рэкамендацый насельніцтву мясцовая ўлада не дае.
Нагадаем, што ў лютым гэтага года свіней, праўда, свойскіх, знішчалі і спальвалі на недалёкай ад Баранавіч Навагрудчыне. Гаспадарам выплачана за іх кампенсацыя. Тады ўлады паведамлялі, што гэта былі вучэнні.
