Тэрарысту Брэйвіку вярнулі ноўтбук
Як заявіла прадстаўніца турмы Іла Элен Б'ерке, гэта не стала вынікам скаргі, якую Брэйвік падаў на гэтым тыдні.
Тэрарыст, які забіў 77 чалавек, скардзіўся на тое, што вымушаны піць халодную каву і што кайданкі занадта жорсткія. Калі яму забаранілі карыстацца ноўтбукам, ад гумовых асадак у яго балелі запясці.
Паводле Б'ерке, выкарыстанне ноўтбука будзе кантраляваць кіраўніцтва турмы — гаворка пра вольны доступ, як гэта было раней, не ідзе. Б'ерке дадала, што такое ж правіла распаўсюджваецца і на заняткі ў спартзалі — Брэйвік зможа трэніравацца, толькі папярэдне атрымаўшы дазвол, перадае ІТАР-ТАСС.
Брэйвік таксама паскардзіўся на тое, што яму не дазволілі мець звільгатняльнік паветра ў камеры без вокнаў. “Я вельмі сумняюся, што дзесьці ў Нарвегіі ёсць месцы зняволення, умовы ўтрымання ў якіх яшчэ горшыя”, — напісаў Брэйвік у лісце на 27 старонках.
Акрамя таго, зняволены паскардзіўся на тое, што яму на сняданак падаюць замала масла.