На што беларускі паралімпіец траціць 280 тысяч долараў прызавых?

13/11/2012 - 16:22

Цяжкаатлетка Ірына Кулеша (75 кг) за бронзу Алімпіяды атрымала 50 тысяч долараў прызавых.

"Казала, што на будаўніцтва пойдуць. Будзе дом будаваць па льготным крэдыце. Ёй толькі нядаўна Лукашэнка падпісаў дакументы, — распавядае Яўгенія Пятроўна, маці атлеткі. — Яна нібыта не мае патрэбы: ёсць кватэра. Але Лукашэнка дакументы падпісаў".

Еўрарадыё: А муж таксама спартсмен?

Яўгенія Пятроўна: "Не, муж будаўнік. Плітку кладзе, ламінат, тынкуе".

Ірына Кулеша

Дарэчы, каб купіць двухпакаёўку ў Брэсце, Ірына некалі брала банкаўскі крэдыт. Для дасягнення жыллёвых мэтаў яна нават не паехала пасля Алімпіяды на замежныя адпачынкі, правяла час на Брэстчыне.

Пры дапамозе прэміяльных вырашае пытанне з жыллём і трыўмфатар паралімпіяды ў плаванні Ігар Бокій.

За пяць залатых медалёў і адно срэбра ён атрымаў 280 тысяч долараў.

Ігар Бокій: "Я куплю кватэру ў Мінску, калі найду добрую. І ўсё. Ад вобласці мне далі кватэру аднапакаёвую ў Бабруйску".

Плыўчыха Аляксандра Герасіменя за два срэбныя медалі лонданскіх Гульняў мусіла атрымаць 150 тысяч долараў прэміяльных. Цікавімся ў спартсменкі, ці выплацілі гэтыя грошы.

Аляксандра Герасіменя: "Канешне, усё, як абяцалі".

Еўрарадыё: І як вы імі распарадзіліся?

Аляксандра Герасіменя: "Пакуль паклала ў банк. Не трэба спяшацца, варта ўсё граматна размеркаваць".

Гэтак жа зрабіла і мастацкая гімнастка Аляксандра Наркевіч: прэміяльныя за бронзавы медаль захавала ў банку. Праўда, пасля гульняў з’ездзіла на адпачынак у Грэцыю.

З апытаных намі спартсменаў прэміяльныя за Алімпіяду не адбіліся радыкальна, хіба, на бюджэце залатога медаліста Максіма Мірнага — топавыя тэнісісты і без таго зарабляюць ого-го!