Мікалай Лазавік: Ярмошына не крыўдзіцца нават на "малпу" і "змяю"

Верш, напісаны Мікалаем Лазавіком асабіста Лідзіі Ярмошынай, які ён прачытаў у нашым эфіры, выклікаў надзвычайную цікаўнасць ў самага шырокага кола людзей.



Але гэта не адзіны такі твор у яго нататніку.

Як стала вядома Еўрарадыё, не так даўно Лазавік напісаў яшчэ адну нятленку, дзе ўзгадваецца старшыня Цэнтрвыбаркама. І гэтым разам у вершы яна паўстала ўвогуле ў незвычайным вобразе — жывёлы. А верш быў прымеркаваны да 8 Сакавіка.

Мікалай Лазавік: “Я паглядзеў па шэрагу гараскопаў: па еўрапейскім, японскім, зараастрыйскім, кветкавым, друідскім, міфалагічным, індыйскім — хто кім з’яўляецца. Ярмошына аказалася — вадалей, змяя, вярблюд, сухацвет, кіпарыс, кентаўр, малпа, паветра. Паводле розных гэтых гараскопаў. І я напісаў:

Решили в Избиркоме создать свой зоосад
Чтоб там деревья были и множество зверят
Чтоб в сад тот заходили все те, кому нужны,
Мандаты депутатов и важные чины.

І вось тут пра Ярмошыну:

Ермошина создала свой стройный кипарис
На нём, как обезьяна, сидит и смотрит вниз
А там внизу — она же, очковая змея
Боятся её взгляда ЕС и их друзья
Она верблюд голодный, бессмертник свой жуёт
Она кентавр верховный — приказы всем даёт”






Паводле словаў паэта з ЦКВ, Ярмошына не крыўдзіцца нават на такія параўнанні — і пагатоў не абражаецца тым, што ў мінулым творы Лазавік накіраваў яе ў Бабруйск.

Мікалай Лазавік: “Нават на такое: на малпу і змяю-акулярніцу яна не крыўдзіцца. З усмешкай успрыняла і з падзякай”.

Як прызнаўся Еўрарадыё сакратар Цэнтрвыбаркама, яго вершаваная творчасць не абмяжоўваецца аднымі прысвячэннямі непасрэднаму начальніку. "Паэт-прафесіянал", як ён сам сябе называе, паспеў выдаць даволі аб’ёмістую “самвыдатаўскую” кніжку, дзе ўзгадаў шмат каго з вядомых палітыкаў і чыноўнікаў. Праўда, кніжка выйшла абмежаваным накладам і ў крамах не прадаецца.

Мікалай Лазавік: “Сярод тых, каму прысвячаў, — у першую чаргу парламенту. Напрыклад, казка-быль “Да пытання аб канстытуцыйнасці, устрыманні і братэрскай любові,” паэма “Дэпутат устрымаўся”. Малафееву ёсць віншаванне да 70-годдзя, Красуцкаму, супрацоўнікам Цэнтрвыбаркама, жанчынам да 8 Сакавіка цэнтрвыбаркамаўскім віншаванні бывалі”.

Вось толькі прэзідэнту на 139 старонках кнігі месца не знайшлося: яму, кажа Лазавік, ён не прысвяціў ніводнага верша. Бо піша толькі тым, хто запрашаў паэта-прафесіянала за стол, — а Лукашэнка гэтага пакуль не зрабіў.

Мікалай Лазавік: “З Аляксандрам Рыгоравічам не ў такіх цесных адносінах, і таму я яму не пісаў. Я тым, хто мяне запрашаў за святочны стол, тым і пісаў. А калі за стол не запрашаў, то і паэму не атрымліваў! Я ж кажу — я пішу як прафесіянал”.

Прадаць ці падараваць сваю кніжку вершаў карэспандэнту Еўрарадыё Мікалай Лазавік адмовіўся. Кажа, дае яе толькі тым, пра каго там ёсць вершаваныя радкі. Але прапанаваў напісаць карэспандэнту альбо радыё верш-прысвячэнне на замову. Праўда, папярэдзіў, што з незалежнага СМІ возьме за сваю працу дорага — адным запрашэннем за стол не абыйсціся.

Таксама па тэме:

Лазавік напісаў верш для Ярмошынай, а Гайдукевіч выпускае зборнік шансона